CCOO de Industria | 5 febrero 2025.

A dimensión da igualdade de xénero ha ser integrada de forma explícita e global nas decisións e medidas que se establezan para saír da crise, tamén por parte da Xunta de Galicia

    A Federación de Industria fai un chamamento á participación activa de todas as persoas nos actos convocados para celebrar o 8 de marzo en todas as comarcas. A presenza das compañeiras de CCOO ten que ser visible e importante nas mobilizacións.

    06/03/2013. Ferrol
    Temas
    Imaxe do cartel do 8 de marzo de 2013

    Imaxe do cartel do 8 de marzo de 2013

    A conmemoración do Día Internacional da Muller 2013 volverá ateigar as rúas en todo o mundo con máis mobilizacións en prol das conquistas legais igualitarias, reivindicando para as mulleres o dereito ao emprego, o dereito á saúde sexual e reprodutiva e ao aborto, e loitando contra a violencia dirixida ás mulleres e contra os recortes aos servizos públicos.

    O 8 de marzo de 2013 será o quinto ano da maior crise financeira, caracterizada por unha destrución de emprego sen precedentes en España, con consecuencias particularmente graves para as mulleres, afectadas directamente pola perda e a maior precariedade dos seus postos de traballo. En Galicia, no ano 2012 temos 125.600 mulleres no desemprego. As mulleres empregadas concentrámonos no sector dos servizos, con empregos precarios, temporais e a tempo parcial. Os sectores de actividade feminizados comparten a miúdo un baixo prestixio social e salarios cativos.

    A brecha salarial de xénero, que chega ata o 26%, é un feito irrefutable e un factor que inflúe fortemente na feminización da pobreza. Os efectos da crise económica están repercutindo de forma desigual en homes e mulleres en materia de emprego e protección social. Para as mulleres, o paro xa tiña antes carácter estrutural, polo que as desempregadas acceden, en xeral, a menos prestacións. Se a iso lle engadimos as consecuencias a longo prazo das súas traxectorias profesionais descontinuas, resultado da necesidade de atenderen o traballo de coidadoras, con empregos precarios, mesmo informais, mal remunerados, a tempo parcial imposto, é obvio que a súa exposición a unha xubilación en risco de pobreza ou de exclusión social se agudiza.

    A crise está a aumentar o empobrecemento da poboación, pero a incidencia é meirande nas mulleres, que se enfrontan con moita frecuencia a numerosas dificultades: familias monomaternais, trabas para teren unha vivenda, asunción da responsabilidade de persoas ao seu cargo; mulleres maiores que non son admitidas no mercado de traballo etc.

    Os recortes ao noso precario modelo de benestar conducen con certeza a que os servizos e atencións que a Xunta de Galicia debera proporcionar sexan encomendados pola vía dos feitos ao medio familiar, cunhas destinatarias asignadas de antemán: as mulleres. A destrución de servizos e empregos públicos impón unha dobre penalización para as mulleres: son elas as que máis saen do emprego público e son elas tamén as que van dispensar os servizos que deixan de prestar as Administracións públicas.

    A mercantilización e a privatización da educación, a sanidade e a dependencia significan, ademais, que a calidade do emprego nestes sectores moi feminizados siga deteriorándose. Os recortes neoliberais, desde a reforma laboral ao desmantelamento dos servizos públicos, coa precarización das condicións de traballo, o descenso dos salarios, a destrución dos escasos servizos de coidados e a debilitación da protección social, conducen a que cada vez máis mulleres se enfronten a unha «dupla pobreza»:pobres en recursos económicos e pobres en tempo dispoñible.

    A saída da crise non debe atopar apoios no traballo informal sen dereitos, nin no subemprego, nin na segregación ocupacional e sectorial para pagar menos por traballos de igual valor, nin no contrato a tempo parcial con peores salarios e prestacións, nin no  emprego do fogar e de coidados sen equidade en dereitos e obrigas.

    A dimensión da igualdade de xénero ten de integrarse de forma explícita e global nas decisións que se adopten para saír da crise: igualdade de oportunidades ao emprego con dereitos, a percibir un salario igual por traballos de igual valor, a estar libre de acoso sexual e por razón de sexo no desempeño laboral. É dicir, que as mulleres non estean «predestinadas» a sectores e ocupacións con baixos salarios, a seren «empregadas a tempo parcial/paro parcial».

    Na saída da crise han reforzarse os baluartes legais de igualdade acadados no noso país coa mobilización histórica e continua das mulleres e mais co diálogo social. As normas contra a violencia de xénero, pola igualdade efectiva de mulleres e homes en todas as ordes da vida, polo dereito á saúde sexual e reprodutiva e o dereito ao aborto, son leis que supuxeron un avance substancial e que, hoxe por hoxe, están poñendo en cuestión os Gobernos do Partido Popular, no Estado e en Galicia.

    Ante a crise do capitalismo, necesitamos «utopías concretas» que nos marquen o camiño. Cómpre poñer en cuestión a forma de vida e de traballo nesta sociedade, unha tarefa que só se pode desenvolver de maneira colectiva. É o momento máis acaído para unha revisión profunda dos valores capitalistas, fortemente ligados aos valores do patriarcado.

    Por iso é indispensable, e así o esiximos este 8 de marzo, que o Goberno do Estado e o da Xunta de Galicia apliquen a dimensión da igualdade de xénero á hora de establecer políticas reais para facer fronte a esta crise.

    O noso compromiso para lograr a aplicación desa dimensión require que as mulleres e os homes de CCOO continuemos coa nosa mobilización e solidariedade, ata lograrmos a igualdade efectiva en todos os eidos da vida.

    Noticias relacionadas

    CCOO de Industria ofrece en Pamplona un nuevo curso de igualdad

    Eva Madrigal en el II Encuentro sobre Mujer en la Industria y la Minería: “Los planes de igualdad son positivos y su implantación muy necesaria”

    Pepsico Manufacturing AIE mantiene su posición y se niega a facilitar la documentación necesaria para negociar el plan de igualdad: “No hay transparencia”

    Documentación asociada

    Se queres acceder aos actos previstos para o 8 de Marzo onde participará CCOO, pincha aquí.

    Se queres acceder á Gaceta Sindical publicada co gallo do 8 de Marzo, pincha aquí

      •
    Noticias relacionadas

    CCOO de Industria ofrece en Pamplona un nuevo curso de igualdad

    Eva Madrigal en el II Encuentro sobre Mujer en la Industria y la Minería: “Los planes de igualdad son positivos y su implantación muy necesaria”

    Pepsico Manufacturing AIE mantiene su posición y se niega a facilitar la documentación necesaria para negociar el plan de igualdad: “No hay transparencia”

    Documentación asociada

    Se queres acceder aos actos previstos para o 8 de Marzo onde participará CCOO, pincha aquí.

    Se queres acceder á Gaceta Sindical publicada co gallo do 8 de Marzo, pincha aquí